Çfarë duhet konsumuar kur keni aciditet të lartë në stomak?

Rritja e prodhimit të aciditetit në stomak mund të shkaktojë simptoma të ndryshme si refluks, ndjesi djegieje, fryrje, gromësima, dispepsi, përzierje dhe shije thartire në gojë.

Nga: Xhesjana Topalli

Publikimi: 14/11/2017 22:27

Arsyet e hierprodhimit të aciditetit në stomak janë të ndryshme, nga mënyra e të ushqyerit, konsumi i alkolit e deri te trashëgimia. Nëse situata zgjat për një kohë të gjatë e patrajtuar, pasojat mund të jenë dramatike pasi qelizat e stomakut fillojnë të humbin aftësinë mbrojtëse ndaj aciditetit. Modifikimi i ushqimit është një ndër hapat kryesore në kontrollin e aciditetit të stomakut. Le të shohim ushqimet që mund të neutralizojnë lëngjet e stomakut duke e kthyer "ambjentin" në më bazik.

Bulmeti

Qumështi është një ndër ushqimet që mund të qetësojë ndjeshëm hiperaciditetin e stomakut, por duhet të jetë pa yndyrë pasi kjo e fundit mund të shkaktojë të kundërtën. Nënproduktet e qumështit (me yndyrë të reduktuar), si kosi dhe djathi, përbëjnë burim të mirë proteinash dhe kalciumi. Për këtë arsye këshillohet të konsumojmë rreth 3 racione çdo ditë bulmet. 1 racion bulmet = 45gramë djathë, 200 mililitra kos dhe 240 mililitra qumësht.

Frutat

Frutat të cilat kanë aciditet vetë, si portokallet, kivi, qitrot, limonat, ananasi, luleshtrydhet, duhet të evitohen. Mollët janë ndër frutat që ndihmojnë ndjeshëm në kontrollin e aciditetit, gjithashtu rrushi, dardhat, bananet, pjepri, boronicat dhe pjeshkët, janë fruta të tolerueshme mjaft mirë. Gjithsesi, konsumi i frutave nuk duhet të kalojë sasinë e nevojshme ditore që është deri në 4-5 racione në ditë. 1 racion frut = përafërsisht 120 gramë fruta.

Perimet

Përgjithësisht, perimet janë zgjedhje e mirë për një stomak që prodhon aciditet me shumicë, përveç domateve dhe qepëve të cilat, është mirë të evitohen në rastin në fjalë. Zhardhokët si patatet, karrotat, rrepat dhe veçanërisht finoku janë mjaft miqësore me stomakun. Lëngu që përftohet nga shtrydhja e lakrës së bardhë, të freskët, është një ndër produktet më të përsosura për rigjenerimin e qelizave të stomakut dhe mbrojtjen e tyre nga aciditeti. Brokoli, mashurkat, lakrat, lulelakra, kungujt, selinoja dhe verdurat, përbëjnë një pjesë të rëndësishme të ushqimit të shëndetshëm e të ekuilibruar dhe këshillohet të konsumohen në një sasi prej 200-300gramë/ditë.

Lëngu ideal për stomakun

Përbërësit:

400gramë lakër e bardhë

1 mollë e ëmbël

1 kokërr finok

2 feta të holla xhinxher të freskët

Përgatitja:

Shtrydhini perimet të gjitha bashkë dhe konsumojeni lëngun 2 herë në ditë; në mëngjes dhe para gjumit.

Drithërat

Përgjithësisht, buka, makaronat, orizi dhe drithrat janë të pranueshme në këtë dietë. Veçanërisht, tërshëra është mjaft e këshillueshme, si dhe drithrat integrale dhe nënproduktet e tyre. Kujdes; mos i ngarkoni gatimet e tyre me salca të yndyrshme apo djathë të pasur në yndyrë. Këto produkte duhet të përbëjnë burimin kryesor të energjisë që nevojitet në ditë, prandaj përpiquni ti vendosni në pothuaj të gjitha vaktet tuaja.

Mishi & peshku

Ushqimet në këtë kategori janë të lejueshme, mjafton të mos jenë të pasura në yndyrë, mos të teprohet në sasi dhe të mos gatuhen të skuqura. Preferoni peshkun e kaltër, mishin e bardhë të shpendëve - pa lëkurën, vezet e freskëta, fasulet dhe djathin pa yndyrë, si burim kryesor të proteinave. Mishi i kuq këshillohet 1-2 herë në javë, i gatuar në presion me perime dhe erëza, si rozmarina dhe sherebela.

Pijet

Uji është pija më e përshtatshme për organizmin dhe stomakun sensitiv. Disa çajra si kamomili, finoku dhe xhinxheri rekomandohen për të ulur aciditetin. Pijet që duhet të evitohen janë të gjitha ato që përmbajnë kafeinë, alkol, kakao dhe mente.

Produkte të veçanta

Uthulla e mollës, edhe pse tepër acide vetë, rezulton në përmirësim të pH të stomakut. Provoni ta vendosni si përbërës të salcave tuaja për sallatat bashkë me vaj ulliri dhe pak mjaltë.

Probiotikët janë mikroorganizma që luajnë rol tepër ushqyes për aparatin tonë tretës dhe si rrjedhojë janë një armë e fortë kundër dispepsisë që mund të pasojë aciditetin e lartë.