Si shtrohet një tavolinë në një ditë feste

Në një ditë feste, ditëlindje ose Vit të Ri, tavolina duhet të zbukurohet në mënyrë të tillë, që edhe ajo të marrë pamje festive.

Nga: Ndricim Topalli

Publikimi: 12/09/2016 00:07

Në rradhë të parë, mbi tavolinë vendoste mbulesa e bardhë ose me ngjyrë e hekurosur mirë. Që gotat dhe pirunjtë të mos përplasen në tavolinë, mirë është që nën mbulesë të vihet një copë e butë. Në mes të tavolinës vendoset një vazo me lule të freskëta. Kompletet e servirjes vihen sipas numrit të personave, në largësi të barabartë nga njëra tjetra. Fillimisht vihen pjatat e cekëta të mëdha, mbi to pjatat e vogla të cekëta për meze dhe sipër tyre peceta e hekurosur mirë dhe të palosur bukur. Peceta mund të vendoset edhe në të djathtë. Nga ana e majtë vihet pjata e vogël per bukë. Ndërmjet këtyre 2 pjatave vihen 2 pirunj, i madhi dhe i vogli, në të djathtë, 2 thika me teh nga pjata, në fillim e vogla pastaj thika tjetër (në pamundësi vendoset 1 pirun dhe 1 thikë). Përpara pjatës vendosen gotat e pijes në madhësi dhe forma të ndryshme, sipas llojit të pijes që është parashikuar të shtrohet në darkë: për shembull për pije të forta, raki, uzo, konjak, etj. përdoren gota të vogla. Gotat mundësisht të jenë të gjitha me fron. Në 2 vende vendosen kripa me piperin. Në tavolinë, në të dyja anët e vazos, vendosen gjellët e ftohta dhe mezet, mundësisht të zbukuruara, ndërsa gjellët e tjera shërbehen gjatë ngrënies. Shishet me raki, verë, birrë, ujë mineral. Vendosen në vendet bosh të tavolinës. Në anë të piatancës vendoset luga e madhe për ndarjen e gjellëve. Pasi përfundon ngrënia, tavolina pastrohet dhe vendosen ëmbëlsirat dhe frutat, duke i shoqëruar, sipas dëshirës, me verë të bardhë ose shampanjë.