Komenti nuk u shtua

Komenti juaj nuk u shtua. Ju lutem kontrolloni komentin dhe provojeni përsëri.

Komenti u shtua

Komenti juaj u shtua dhe do jetë i dukshëm automatikisht.

Mënyrat e duhura për të kursyer para

Të ardhurat tuaja ndoshta në fund të muajit shkojnë drejt zeros dhe për ju kjo situatë fillon të bëhet e papërballueshme.

Nga: Xhesjana Topalli

Publikimi: 23/12/2017 14:55

Shpenzimet janë të shumta: drita, ujë, gaz, ushqime, veshje, shpenzime për fëmijën etj. Lista duket se nuk mbaron kurrë.

Filloni duke mbajtur shënim çdo shpenzim mujor që i nevojitet familjes suaj, ky është hapi i parë drejt kursimit. Por jo vetëm kaq!

Ju duhet gjithashtu të shënoni çdo shpenzim vjetor që ju takon të bëni: taksat e shtëpisë, taksat e makinës etj.

Disa këshilla që do t'ju çojnë drejt kursimit janë:

I mbani kursimet në bankë

Të mbani lekët që fitoni në një bankë me përqindje vjetore është shumë më ekonomike se ti mbani ato në shtëpi. Benefitet do ti shikoni në fund të vitit me shtimin e interesave vjetore.

Fikni televizorin

Një mënyrë kursimi është të mos mbani ndezur televizorin kjo për disa arsye:

më pak reklama produktesh në shitje për të parë,

më pak energji elektrike e harxhuar

më tepër kohë për veprimtari të tjera gjatë ditës.

Të relaksohesh në darkë para televizorit është diçka e bukur, por është më mirë të gjeni diçka tjetër për të bërë.

Shikoni me sy kritik "koleksionet" tuaja

Të gjithë njerëzit janë të fiksuar pas diçkaje dhe mund të kenë bërë "një koleksion" në shtëpi.

Për shembull: nëse jeni të fiksuara pas çantave dhe keni një numër të konsiderueshëm në shtëpi është koha të mendoni se duhet të largoni disa prej të cilave nuk i përdorni. Të gjitha sendet që nuk ju nevojiten mund ti shisni diku (qoftë edhe online).

Krijoni kartë supermarketi

Edhe pse ndoshta nuk e frekuentoni shpesh supermarketin për të bërë pazaret e ditës nuk ju kushton asgjë të hapni një kartë për një supermarket të caktuar. Nuk i dihet kurrë se kur mund t'ju duhet ta përdorni. Kështu ju do të mblidhni pikët për të marrë një dhuratë të caktuar apo për të përfituar ulje për një produkt të caktuar.

I përgatisni vetë dhuratat

Nëse një i afërmi juaj ka ditëlindjen apo një eveniment tjetër dhe ju duhet ti bëni një dhuratë, mund ta përgatisni vetë kështu ju mund të kurseni para. Çdo dhuratë e bërë duhet shoqëruar me një pusullë urimi nga ana juaj.

Rregulli i 30 ditëshit

Nëse ju pëlqen diçka në një dyqan dhe dëshironi jashtëzakonisht shumë ta bleni, ju këshillojmë të prisni 30 ditë. Zakonisht sendet që janë pak të rëndësishme harrohen brenda afatit kohor. Ndërkohë ju do të keni kursyer paratë e një objekti që nuk ka rëndësinë e duhur.

Respektoni listën e pazareve të javës/muajit

Gjëja e parë që duhet të bëni ndërsa shkoni të bëni Pazar është të përpiloni një listë me të gjitha sendet dhe ushqimet e nevojshme për familjen tuaj. Nuk duhet në asnjë mënyrë të blini diçka që nuk është shënuar në listë.

Gjithashtu ju duhet të keni parasysh se nuk duhet të hyni në një dyqan të caktuar pa pasur idenë e qartë se çfarë do të blesh.

I ftoni miqtë në shtëpi

Çfarëdo aktiviteti të bëni me miqtë tuaj brenda shtëpisë do të kushtojë më pak se jashtë saj. Në vend që të dilni diku për të ngrënë apo pirë diçka ju mund ti ftoni ata në shtëpinë tuaj dhe të gatuani diçka. Mund të shoqëroni mbrëmjen me një film të bukur apo një lojë argëtuese.

Rregulloni veshjet e dëmtuara

Mos e hidhni një këmishë që i ka rënë butoni. Hiqni butonin e fundit dhe qepeni atje ku mungon, më pas qepni në vend të butonit të fundit një tjetër të ngjashëm.

Gjithashtu ju këshillojmë të blini rroba të përdorura. Ju mund të blini rroba të reja vetëm në rast se vërtet është e nevojshme.

I thoni jo lodrave të shtrenjta

Fëmijët tuaj kanë nevojë të kalojnë më shumë kohë me ju dhe jo për një lodër të shtrenjtë. Për ta gjithçka e bërë me ju do të jetë argëtuese, prandaj zgjidhni të blini një lodër më pak të kushtueshme ose një libër të madh ngjyrosjeje për ta përfunduar së bashku.

Konsumoni më shumë ujë

Nëse do të konsumoni më shumë ujë do të jetë mirë jo vetëm për shëndetin por edhe për portofolin. Nëse do të konsumoni një gotë të madhe me ujë para një vakti (sidomos në restorant) ju do të hani më pak ushqim.

Mos konsumoni ushqim të gatshëm

Në një moment të javës që do të jeni disi më i lirë mund ti dedikoheni përgatitjes së ushqimit të gatshëm për ta përdorur kur të keni më pak kohë për të gatuar. Kjo do t'ju mbajë larg fast food-eve dhe pranë kursimit.

Mos konsumoni cigare dhe alkool

Të shpenzosh për diçka që nuk të jep asgjë në këmbim është ves i cili duhet nxjerrë sa më parë nga jeta. Ju duhet të hiqni dorë nga shpenzimi i parave të kota për cigare dhe alkool. Në fund të ditës do të keni shëndet më të mirë dhe lek më shumë në portofol.

Gatuani mish në sasi të mëdha

Nëse një ditë ju takon të gatuani një pjatë me mish (të marinuar për shembull) në vend të 1 porcioni bëni 4 dhe i vendosni në ngrirje. Gjatë ditëve mjaft impenjative do t'ju duhet thjesht ta ngrohni atë në mikrovalë dhe kështu nuk do t'ju duhet të shkoni të hani diku jashtë shtëpisë.

Mos mbani drita të panevojshme ndezur

Të kurseni tek energjia elektrike është çelësi. Nuk kanë pse qëndrojnë ndezur drita dhe pajisje elektrike të panevojshme në shtëpi. Sigurohuni që në momentin që dilni nga shtëpia për të shkuar diku të gjitha dritat të jenë të fikura.

Ndërroni librat dhe CD

Ka shumë faqe online në të cilat mund të ndërroni libra ose CD që tashmë ju kanë lodhur. Ju mund të merrni diçka të re pa qenë nevoja e shpenzimit të parave.

Mos blini fruta dhe perime në ofertë

Nëse gjeni në treg mollë 3 kilogramë 1 000 lekë ka shumë mundësi që sa të shkoni në shtëpi gjysmat të jenë kalbur. Zakonisht këto lloj produktesh që tregëtohen me çmim të ulët rezultojnë të jenë më pak ekonomike.

Vendosni llampa ekonomike

Llampat ekonomike kanë kosto më të lartë krahasuar me llampat normale, por ato harxhojnë rreth 2% më pak energji dhe kanë jetëgjatësi më të madhe.

Kujdes kur blini pajisjet elektrike

Ndërsa jeni duke blerë një lavatriçe të re mos pretendoni të shpenzoni sa më pak të jetë e mundur. Ju duhet të blini një produkt i cili harxhon më pak energji. Duke shpenzuar një dorë të mirë parash në momentin e blerjes do të kurseni para për vitet në vazhdim.

Pastroni rregulisht filtrin e ajrit të kondicionuar të makinës

Një filtër ajri i pastër do t'ju bëjë të harxhoni rreth 7% më pak karburant.

Mos mbani në portofol kartën e kreditit

Nëse mendoni se do t'ju duhen para për një rast urgjent atëherë përdorini, në të kundërt mund ti lini në shtëpi diku të vendosura në raft për të mos i përdorur për gjëra të kota.

Gatuani në bazë të ofertave

Programoni recetat e javës në bazë të produkteve në ofertë që do të gjeni nëpër supermarket dhe jo anasjelltas.

Frekuentoni supermarketin më ekonomik

Nuk keni pse paguani për të njëjtin produkt 2-fishin e parave. Ju mund të krahasoni çmimet e supermarketeve të ndryshme dhe të blini tek ai që kushton më pak për xhepin tuaj.

Mos blini bukë

Nëse mendoni se të konsumoni bukë të blerë kushton njësoj me atë që do të bëni në shtëpi, e keni gabim. Përveç kursimit, do të hani diçka të shijshme dhe të shëndetshme.

Mos i përdorni paratë si anti-stres

Nëse përdorni shpesh paratë për të hequr lodhjen dhe stresin e ditës është koha të hiqni dorë. Ka shumë mënyra për tu qetësuar dhe çlodhur pa harxhuar para. Në vend të kësaj ju mund të bëni një shëtitje ose te uleni diku në park për të shijuar natyrën.

Mirëmbani pajisjet elektroshtëpiake

Pastroni me kujdes nga pluhuri dhe papastërtitë e tjera pajisjet tuaja elektroshtëpiake me qëllim që të kenë jetëgjatësi të madhe.

Frekuentoni tregun e sendeve të përdorura

Nëse keni nëvojë për një veshje ose send të caktuar, mirë është të kërkoni si fillim në tregun e të përdorurave. Do të blini kështu atë që ju nevojitet dhe do të kurseni para për diçka tjetër.

Mbani sa më pastër duart

Nëse ju kujdeseni për higjenën e duarve do të mbani larg trupit viruset dhe bakteret dhe kështu do të jeni më pak të predispozuar për tu prekur nga sëmundjet. Në këtë mënyrë do të kurseni paratë që do të shpenzonit për medikamentet kuruese.

Pëlqeni dhe shpërndani Perspekti.com

Artikuj të ngjashëm